गड मजबूत, तरीही लोढांसमोर अमंगलची भीती

 मुंबई मलबार हिल विधानसभा मतदार संघात २०१२ मध्ये शिवसेना-भाजपची युती असताना शिवसेनेचे ३ नगरसेवक आणि भाजपचे २ नगरसेवक तर काँग्रेसचे दोन नगरसेवक होते. परंतु २०१७ च्या निवडणुकीत शिवसेना आणि भाजप युतीत न लढता स्वबळावर लढली. त्यामध्ये भाजपचे दोन ऐवजी चार नगरसेवक निवडून आले. तर शिवसेनेचे तीन ऐवजी केवळ एकमेव नगरसेविका आहे आणि काँग्रेसचा एक नगरसेवक आहे. त्यामुळे  २०१२ च्या  निवडणुकीच्या तुलनेत मागील निवडणुकीतया मतदार संघात भाजप आमदार मंगलप्रभात लोढा यांनी आपले वर्चस्व दाखवून देत चार नगरसेवक निवडून आणतानाच शिवसेनेचे पूर्ण पंख छाटून ठेवले होते. तसेच काँग्रेसचेही अस्तित्व कमी करून टाकले आहे.

या मतदार संघावर प्रारंभापासून शिवसेना आणि काँग्रेसचे वर्चस्व राहिले आहेत. गिरगावमध्ये शिवसेनेचे नगरसेवक निवडून यायचे. परंतु मागील निवडणुकीत गिरगावमधून शिवसेनेचे अस्तित्वच संपवून टाकले. त्यामुळे शिवसेनेच्या एकमेव नगरसेविका ज्या निवडून आल्या आहेत, त्या मुंबई सेंट्रल परिसरातील आहे. ज्याठिकाणी काँग्रेसचा नगरसेवक निवडून यायचा. परंतु लोढा यांनी काँग्रेसला शह देतानाच शिवसेनेच्या एका जागेवर मेहरबानी दाखवली असली तरी उर्वरीत सर्व जागांवर भाजपने शिवसेनेसह काँग्रेसला डोकेवर काढू दिले नव्हते. परंतु २०१७ च्या निवडणुकीच्या तुलनेत २०२२ ची निवडणूक महत्वाची असून या निवडणुकीत शिवसेना आणि भाजप हे त्वेषाने लढले जाणार आहे. त्यामुळे आजवर दक्षिण मुंबईत लोढा यांनी आपल्या वेगळ्या राजकारणाची झलक दाखवत आपले उमेदवार निवडून आणले असले तरी येत्या निवडणुकीत लोढा यांच्यासमोर जे चार नगरसेवक निवडून आले आहेत, त्या सर्व जागा अबाधित राखणे हे सर्वात मोठे आव्हान आहे. त्यामुळे लोढा यांची मतदार संघाची बांधणी मजबूत असली तरी राज्यात शिवसेना आणि काँग्रेस हे दोन्ही पक्ष महाविकास आघाडीच्या सरकारमध्ये असल्याने त्यांच्याकडूनही तेवढीच ताकद या मतदार संघात लावली जात आहे. त्यामुळे दक्षिण मुंबईत पुन्हा भगवा फडकवण्यासाठी पूर्ण ताकद लावली जाणार आहे.

गिरगावमध्ये प्रमोद नवलकर, विलास अवचट, रविंद्र मिर्लेकर, अरविंद नेरकर, सुरेंद्र बागलकर यांच्यासारखे  नेते होऊ गेले. परंतु युतीच्या नावाखाली कायमच शिवसेनेने भाजपशी तडजोड करत येथील जागा आपल्या पारड्यात पाडून घेण्याचा प्रयत्न केला. २०१२ च्या निवडणुकीत शिवसेनेने जागा न सोडल्याने लोढा यांनी आपले समर्थक अनिल सिंह यांना शिवसेनेत पाठवून निवडून आणले होते. सेनेला त्यावेळी आपली एक जागा वाढल्याचा आनंद झाला असला तरी ती मोठी चूक होती, हे आता गिरगांव मधील शिवसैनिक बोलतांना दिसतात.

पूर्वी अरविंद नेरकर हे शिवसेनेचे आमदार बनून गेले. परंतु त्यानंतर शिवसेनेला कधीही याठिकाणी आमदार निवडून आणता आला नाही. त्यामुळे नाही आमदार बनला आणि नाही त्यांचे नगरसेवकांची संख्या वाढली गेली. त्यामुळे केवळ अस्तित्वापुरती एकमेव नगरसेवक उरला आहे. तर काँग्रेसच्या वतीने प्रमोद मांद्रेकर,शांतीलाल दोषी यांचेही वर्चस्व संपुष्टात आणले गेले. त्यामुळे निवडणुकीच्या शेवटच्या क्षणाला राजकीय समिकरणे बदलून टाकणारे लोढा यंदाच्या निवडणुकीत कोणती राजकीय समिकरणे वापरुन शिवसेनेला चेकमेट करतात याकडेच सर्वांचे लक्ष आहे.