गडचिरोलीत स्कूल बसचा भीषण अपघात! अनेक विद्यार्थी जखमी

गडचिरोली जिल्ह्यातील सिरोंचा तालुक्यातील अंकिसा येथून आसरअलीकडे निघालेल्या स्कूल बसचा मंगळवारी सायंकाळी भीषण अपघात झाला आहे. या बसमधील ६० ते ६५ विद्यार्थी गंभीर जखमी झाल्याची माहिती समोर येत आहे.

६० ते ६५ विद्यार्थी गंभीर जखमी

ए पी – १५ एक्स ९६१७ क्रमांकाची स्कूल बस अंकिसा येथील लक्ष्मीकांतय्या इंग्लिश मिडियम पब्लिक स्कूल येथून शाळा सुटल्यावर जवळपास ६० ते ६५ शालेय विद्यार्थ्यांना घेऊन आसरलीकडे जात होती. दरम्यान ही बस रस्त्याकडे उलटल्याने अनेक विद्यार्थी गंभीर झाल्याची माहिती मिळाली आहे.

खाजगी शाळांच्या बस सुरक्षित आहेत का ? 

स्कूल बसचा अपघात झाल्याची माहिती मिळाल्यावर पालकांनी घटनास्थळी धाव घेतली. या बसचा वाहनचालक नशा करून वाहन चालवत असल्याची माहिती काही पालकांनी दिली आहे. अंकिसा ते आसरअली हा राष्ट्रीय महामार्ग असून हा रस्ता थेट छत्तीसगडकडे जातो. स्कूल बस अक्षरश: भंगार स्थितीत असल्याची माहिती पालकांनी दिली आहे. खाजगी शाळेत चालविल्या जाणाऱ्या या बस विद्यार्थ्यांसाठी खरंच सुरक्षित आहेत का असा सवाल आता पालकांकडून उपस्थित केला जात आहे.