D Gukesh : टाटा स्टील बुद्धिबळ स्पर्धेत डी गुकेशने आघाडी वाढवली, प्रग्यानंदाच्या पराभवामुळे गुकेशचं स्थान बळकट

• ऋजुता लुकतुके

टाटा स्टील बुद्धिबळ स्पर्धेत आता दहा डाव पार पडले आहेत. आणि त्यानंतर भारताच्या डी गुकेशने आपली आघाडी कायम राखली आहे. त्यासाठी दहाव्या फेरीत मॅक्स वॉर्मरडॅमचा त्याने पराभव केला. काळ्या मोहऱ्यांनी खेळताना गुकेशने पारंपरिक भारतीय पद्धतीने सुरुवात केली. आणि हळू हळू डावावर पकड बसवली. पांढऱ्या मोहऱ्यांचं पाठबळ असतानाही वॉर्मरडॅम पेक्षा गुकेश आक्रमक होता. आणि अगदी चौथ्या चालीतच त्याने प्रतिस्पर्ध्यांचं पहिलं प्यादं मारलं. (D Gukesh)

(हेही वाचा- Kumbh Mela Stampede : दुर्घटनेनंतर सरकारने उचलली पावले, VIP पास रद्द, वाहनांना प्रवेशबंदी)

तिथून द्वंद्व सुरू झालं ते डावाच्या मध्यावर आणखी तीव्र झालं. पण, यात गुकेशने खेळाचा रोख आपल्याकडे राहील याची काळजी घेतली. वॉर्मरडॅमवर सातत्याने दडपण आणलं. आणि अखेर २४ व्या चालीत त्याच्याकडून चूक झालीच. तिचा फायदा उचलत गुकेशने मग खेळावरील पकड वाढवत नेली. चारही बाजूंनी कोंडी झाल्यावर वॉर्मरडॅमने हार मान्य केली. वॉर्मरडॅम स्थानिक खेळाडू असल्यामुळे प्रेक्षकांचा त्याला पाठिंबा होता. पण, गुकेशलाही विजयानंतर प्रेक्षकांनी उभं राहून मानवंदना दिली. (D Gukesh)

नेदरलँड्समध्ये होणारी टाटा स्टील बुद्धिबळ स्पर्धेचा हा ८७ वा हंगाम आहे. आणि ही स्पर्धा बुद्धिबळातील विम्बल्डन मानली जाते. प्रतीष्ठेच्या या स्पर्धेत डी गुकेशनं आपलं वर्चस्व दाखवून दिलं आहे. शेवटचे दोन सामने जिंकून त्याने प्रतिस्पर्ध्यांवर मजबूत आघाडी घेतली आहे. दुसरीकडे, प्रग्यानंदानेही एका पराभवानंतर पुन्हा विजयाचा मार्ग शोधून काढला आहे. त्याने दहाव्या डावांत ग्रँडमास्टर फेडोसीव्हचा निर्णायक पराभव केला. ३४ व्या चालीत दोघांनी राण्यांची अदलाबदली केली. पण, पुढे प्रग्यानंदाने आपलं प्यादं प्रतिस्पर्ध्याच्या तंबूत आरपार घुसवून आपली राणी जीवंत केली. आणि अखेर फेडोसीव्हला मात दिली. प्रग्यानंद आता स्पर्धेत तिसऱ्या स्थानावर आहे. (D Gukesh)

(हेही वाचा- Ladki Bahin Yojana मध्ये परप्रांतियांचा शिरकाव ; 1171 बोगस अर्ज दाखल)

१० फेऱ्यांनंतरची गुणतालिका 

डी गुकेश (७.५), नोदीरबेक अब्दुसातोरोव्ह (७.०), आर प्रग्यानंदा (६.५), व्लादिमीर फेदोसीव्ह (६.), फाबियानो कारुआना (५.५), वाय ई (५.५), अनिष गिरी (५), ॲलेक्सी सराना (५), हरिकृष्णा (४.५), जॉर्डन व्हॅन फॉरिस्त (४), व्हिन्सेंट किमर (४), मॅक्स वॉर्मरडॅम (३.५), अर्जुन एरिगसी (३) व लिऑन ल्युक मेंडोंका (३)

हेही पहा-