Virat Kohli : विराट कोहलीला पाहायला अरुण जेटली मैदानावर १५,००० प्रेक्षक, कोहलीला गोलंदाजी देण्याची केली मागणी 

• ऋजुता लुकतुके

दिल्लीच्या अरुण जेटली मैदानावर बुधवारपासूनच एक वेगळीच हलचल आहे. दिल्लीच्या ओसरणाऱ्या थंडीत लोकांनी सकाळपासून घराबाहेर पडून पूर्वीच्या फिरोझशाह कोटला मैदानावर गर्दी केली होती. निमित्त होतं दिल्ली विरुद्घ रेल्वे रणजी सामन्याचं. पण, लोकांना आकर्षण होतं ते स्टार खेळाडू विराट कोहलीला पाहण्याचं. तब्बल १३ वर्षांनंतर विराट स्थानिक संघ दिल्लीकडून रणजी सामना खेळत आहे. त्यामुळे त्याच्या सरावापासूनच लोकांनी मैदानावर गर्दी केली आहे. तर गुरुवारी सामन्याच्या पहिल्या दिवशी मैदानावर चक्क १५,००० प्रेक्षक उपस्थित होते.  (Virat Kohli)

(हेही वाचा- UK अण्वस्त्रांसह Islamist Nation बनू शकते; ब्रिटीश खासदार सुएला ब्रेव्हरमन यांचे भाकीत)

रणजी सामन्यासाठी अलीकडच्या काळात हा प्रेक्षकांचा उच्चांक आहे. आयुष बदोनी सामन्यात दिल्लीचं नेतृत्व करत आहे. आणि त्याने सुरुवातीला नाणेफेकही जिंकली. पण, संघाचा निर्णय होता प्रथम फलंदाजीचा. त्यामुळे विराट कोहलीची फलंदाजी प्रेक्षकांना पाहता आली नाही. पण, शुक्रवारी कोहलीला खेळताना पाहण्यासाठी आणखी गर्दी होईल असा अंदाज आहे. (Virat Kohli)

विराटने सुरुवातीपासून पहिल्या स्लिपमध्ये क्षेत्ररक्षण केलं. आणि दोन षटकांच्या मध्ये प्रेक्षकांनी कोहलीचा जयघोष सुरू ठेवला होता. तर दिल्लीची गोलंदाजी आहे म्हटल्यावर काही वेळाने लोकांनी, ‘कोहलीला चेंडू द्या,’ अशी हाकाटी सुरू केली.  (Virat Kohli)

RCB..RCB..Kohli Ko Bowling Do Chants At Arun Jaitley Stadium, Delhi.🤍#ViratKohli #RCB #RanjiTrophy @imVkohli pic.twitter.com/GMQU4E5MFL

— virat_kohli_18_club (@KohliSensation) January 30, 2025

 कोहलीने मात्र प्रेक्षकांना कुठलंही प्रत्युत्तर दिलं नाही. संघातील खेळाडूंना प्रोत्साहन देण्याचं काम तो करत होता. रेल्वेला पहिली फलंदाजी दिल्यावर दिल्लीकर तेज गोलंदाज नवदीप सैनी, मॉनी ग्रेवाल आणि सिद्धांत शर्मा यांनी अचूक गोलंदाजी केली. त्यामुळे पहिल्‌या सत्रातच रेल्वेची अवस्था ५ गडी गमावून ५६ धावा अशी झाली होती. पण, उपेंद्र यादवने ९५ धावा करत रेल्वेचा डाव सावरला. त्याला कर्ण शर्माने ५० धावा करत चांगली साथ दिली. ही जोडी फुटल्यावर पुन्हा एकदा फिरकीपटू सुमित माथुरने ३ बळी घेत रेल्वेचा डाव २४१ धावांत संपवला. (Virat Kohli)

(हेही वाचा- मंत्री Narahari Lake यांचा नोंदणी न करता ३०-४० लोकांना घेऊन मंत्रालयात प्रवेश; सुरक्षेचा गंभीर प्रश्न उपस्थित)

दिल्लीने दिवसअखेर १ गडी बाद ४४ धावा केल्या आहेत. विराट कोहली चौथ्या क्रमांकावर फलंदाजीला येणार आहे. (Virat Kohli)

हेही पहा-